الخميس، 20 يناير، 2011

وقائع ما حدث

هو ده بالظبط اللى حصل، اشتريت امبارح كورونا بالبندق، لما رجعت البيت أخدت منها والنهاردة الصبح بعد الفطار لقيت لسة فيه حتة فاضلة، أكلتها ..... بس اللى حصل انى لما جيت أرمى الغلاف لمحت تاريخ الانتاج. اكتشفت انو الصلاحية انتهت من شهرين تقريبا

سرحت شوية، افتكرت انها كانت الوحيدة من نوعها الموجودة بتلاجة المحل، القالب الوحيد الفاضل، وانى كنت مصممة أجيب اللى بالبندق مع انى بحب نوع تانى وقلبت عليها التلاجة فوقانى تحتانى وفى الآخر لقيتها واقفة واخدة ركن لوحدها

تخيلت ان بقالها سنة وشهرين مستخبية هناك فى البرد ورافضة أى ايد تتمد عليها وصابرة ومستنية، وافتكرت فى الآخر انى ماحاولتش أهتم لما لقيتها متكسرة حتت أول ما فتحتها ولا ان طعمها متغير شوية. ما انتبهتش لوحدتها وكسرتها وطعمها الغريب. كل اللى فكرت فيه انى بحب الشوكولاتة ، وانى هاكلها وهفضل سليمة ومش هيجرى لى حاجة

رجعت أبص عالورقة تانى، وبعدين سبتها على ترابيزة السفرة وقمت. طول اليوم قعدت أسأل روحى: اشمعنى نوفمبر، واشمعنى الألفين وتسعة؟

غريبة أنا صح؟؟

بس، هو ده كل اللى حصل

هناك تعليقان (2):

  1. أزال المؤلف هذا التعليق.

    ردحذف
  2. بالهنا والشا ياستى
    بس انتى لاقيتى كرونا دى فين
    دانا بقالى قرن مش بسمع عنها

    انا كمان بحب الشيكولاته
    لكن بفضل البلاك شيكولايت

    لما بيحصلى موقف الى الى حصلك
    بقنع نفسى انهم يقصدوا ان الصلاحيه دى لما يكون المنتج بره التلاجه
    لكن انا لاقيته فى التلاجه
    علشان اعيش مبسوط

    حروفك جميله
    استمتعت جدا بكلامك


    تحياتى

    ردحذف