السبت، 31 مارس، 2012

على فكرة

(32)
رغم الحاجات، لكن الابتسامة الواسعة الصافية بقت ضيف جديد على ملامح وشي الأيام دي !

السبت، 24 مارس، 2012

أه عارفة !

"وعارفة إحساس إنك تكونى قاعدة فى أى مكان مع أى حد وكل الهاجس اللى مسيطر عليكى “هوّ أنا هاروّح إمتى؟” .. عارفة إحساس الحنين لكيان مجهول؟ أنا عندى حنين ما بعرف لمين ♪ ♫ .. عارفة فكرة “البيت” نفسها لما تتحوّل لكيان مجهول؟ دايمًا بحس إن الناس اللى بينهم تواصل جميل هما الناس اللى واحشهم أوى نفس المكان المجهول.. مكان ممكن مايكونش موجود أصلاً بس همّا اتقابلوا فى نفس السكة وهما بيحاولوا يوصلوله.. أنا دايمًا
فى حالة حنين للبيت السيريالى ده.. دايمًا واحشنى حد أو حاجة أو مكان.. وبعدين أنتِ عارفة أصلا إن الإنسان مشكلته العويصة أنه كائن قابل للإدمان.. وأنا إدمانى مش لحاجات بتتاكل وتتشرب ويتعمل بيها دماغ.. أنا بدمن الناس والأمكنة والحاجات والعادات والأحاسيس والأفكار.. عشان كده لما الحنين بيبهت بتجيلى أعراض انسحاب عمرها ما بتكمل.. لأن الحنين عمره ما بيروح ..."

الأربعاء، 7 مارس، 2012

على فكرة

(31)

الفكرة إني كل يوم وأنا مروحة م الجامعة، بابقى متخلية إنه فيه حد مستنيني في البيت، أو إني هروّح من سكة تانية المرة دي ... البيت مليان ناس، بس أول ما أدخل م الباب باحس إني عايزة أعيّط، وأدفس روحي في حضن السرير لتاني يوم !!

السبت، 3 مارس، 2012

:) :)


النهاردة رضوى اشترت لي صبّارة صغننة مزروعة في الرمل جوا فخارة زرقا، الصبّارة بعد شوية وقت بتطلع ورد أحمر صغير والشوك بتاعها ما بيعوّرش … أنا فرحانة بيها أوي، لدرجة إنه عينيّ دمعت وأنا مروحة في المترو وقعدت أفكر نفسي إني هسقيها كل أسبوعين وأحاول أتخيل شكل الورد لما يزهّر .. فكرت كمان آخدها معايا الشغل وأحطها في مكان شمس -مع إنها مش محتاجة الشمس - بس أنا متخيلة شكلها في النور …..

حد عارف لما يحس بحاجة إنها حتة منه؟! .. الأهم من كل دا الجملة اللي قالتها لي: "هى دي اللي هتعدّي معاكي كل الوقت الجاي" ..... أنا قلت إني بحب رضوى قبل كدا صح؟

أنا ممتلئة بالحب لرضوى !